प्रकरण अंगावर शेकणे

प्रकरण अंगावर शेकणे हा वाक्प्रचार आपण अनेकदा ऐकला असेल , पण याचा दातांशी काय संबंध? आता पुढच्या गोष्टीत आपल्याला कळेलच .. . या गोष्टीतली पात्रे जरी काल्पनिक असली तरी , असे पेशंटस् डेन्टल क्लिनिक मध्ये बऱ्याचदा येतात याबद्दल सर्वच डेंटिस्टस् सहमत होतील.

त्यादिवशी सकाळी आठ वाजताच दाराची बेल वाजली. आमच्याकडे कामाला येणाऱ्या चंद्रभागा मावशी नेहमी ९ ला येतात , त्याच लवकर आल्यात असं समजून मी दार उघडलं . दारात मावशी होत्याच पण एकट्या नव्हत्या , त्यांच्यासोबत गाल हाताने पकडून ठेवलेली त्रस्त चेहऱ्याची साधारण तिशीतली एक मुलगी सुद्धा होती.
मी काही विचारण्याच्या आतच स्वभावाप्रमाणे मावशींची बडबड सुरू झाली ” बाय , ही आमच्या शेजारची सुषमा, रातभर दाताच्या दुखण्याने झोपलेली नाय , अनी आज सकाळपासून त्वांड पन सुजलंय , लई दुखते तिला. म्हणून मग दवाखाना उघडण्याची वाट नाय बघितली हिला घरीच घेऊन आलो . बाय तुला त्रास दिला “

“अहो त्रास कसला त्यात?” सुषमा ची अवस्था बघून तिला म्हटलं ,” दवाखान्यात तर तपासावंच लागेल, नंतर या तिथे , पण सध्यापुरती दुख ण्यासाठी गोळी देते. काही खाल्लं आहेस का ग ?” सुषमाचं रडवेलं हळू आवा जातलं उत्तर आलं “नाही”
” जरासं दूध वगैरे पिऊन गोळी घेऊन टाक ” असं म्हणून मी तिला एक गोळी दिली .
क्लिनिक मध्ये गेल्यावर सुषमा आणि मावशी आलेल्याच होत्या .सुषमाचा चेहरा आता जरा बरा दिसत होता .
सुषमाचं चेकअप केलं . तिच्या तोंडातल्या एका किडलेल्या दाढेमुळे तिला एवढं दुखत होतं आणि सूज पण आली होती.

” काय गं, दाढ तर बरीच खराब आहे . कधी पासून दुखतेय दाढ ?शेकलंस की काय गरम पाण्याने ?
“अधूनमधून दुखायची दाढ , काल तर लईच दुखत होती , कामंच सुचेना ,मग माझी मैत्रीण म्हणाली ,’शेक , बरं वाटेल.’ म्हणून शेकलं रात्री .” इति सुषमा ..
“अगं , आपले पाय ,पाठ ,कंबर दुखते ;तेव्हा गरम शेकण्याने बरं वाटतं ; तोच नियम तू दातांनाही लावलास आणि त्यामुळे ही एवढी मोठी सूज आलीये. आता आधी सूज कमी करायची औषधे घ्यावी लागतील , मगच इलाज करता येईल .”
” आपली पाठ किंवा कंबर दुखते, तेव्हा तिचे स्नायू अति श्रम किंवा चुकीच्या ताणामुळे दुखतात , गरम शेकण्यामुळे तिथे रक्तपुरवठा वाढतो, तिथली सूज ओसरून, दुखणं कमी व्हायला मदत होते.