आमच्या सोसायटीत राहणारी सानवी ६ वर्षांची.. एकुलती एक.. . खूप गोड स्वभावाची …. दोन्हीकडच्या आजीआजोबांची लाडकी.. त्यामुळे प्रत्येक हट्ट नेहमी पुरवला जात असलेली..
तिला क्लिनिक मध्ये घेऊन आई बाबा आजी आजोबा असे सगळेच आले होते . तिच्या दात दुखीमुळे अख्खं घर चिंतेत होतं .

“बघा ना हो डॉक्टर, सानवीची दाढ दुखते कालपासून…. कालपासून सारखी रडते आहे, काही खात नाही , धड झोपली पण नाही.” सानवीचे खाण्यापिण्याच्या बाबतीतले लाड मी बघितले होते ,त्यामुळे तोंडात काय परिस्थिती असेल याचा मला साधारण अंदाज होताच.

” तिला तपासल्यानंतर मी औषधे लिहून दिली व या औषधाने तात्पुरता आराम नक्की पडेल”  हेदेखील समजावलं

लगेच काळजीच्या सुरात तिच्या आजीने विचारले ,”पण तिला खायला वगैरे जमेल ना ?सध्या नुसतं मऊ मऊ किंवा लिक्विडच घेते आहे ती ….तेही थोडंसं ”

” हो काकू , पण तिच्या या दातांची ट्रीटमेंट करावी लागेल “

“ट्रीटमेंट  कशाला? पडणारच आहे ना तो दुधाचा दात ..”तिचे आजोबा म्हणाले
” आजोबा दात पडणारच आहे ; पण तिच्या वयाच्या दहाव्या ते बाराव्या वर्षापर्यंत ”
” एवढ्या उशिरा कुठे?  ती सहा वर्षांची झाली आहे . आता पडतात ना दुधाचे दात?”
” हो काका  , सहाव्या वर्षापासून दुधाचे दात पडायला हळूहळू सुरुवात होते व पडण्याची प्रक्रिया बाराव्या वर्षापर्यंत सुरू असते.  बारा वर्षे दुधाच्या दाढा पडतात त्यामुळे आता चार-पाच वर्ष तरी ही दाढ तिला जेवण चावण्यासाठी लागणार आहे . दाढाच नसतील तर ती जेवेल काय? आणि मग तिची वाढ कशी होणार?  त्यामुळे तिच्या सर्व दाढा गरजेप्रमाणे रूट कॅनल ट्रीटमेंट किंवा फिलिंग करून वाचवायला हव्यात ”
” त्या पेक्षा काढूनच टाका ना मग.. ..  नाहीतरी चार-पाच वर्षांनी नवीन दात येणारच आहे ना” सानवी च्या बाबांनी लगेच सुचवलं”
” अहो दुधा चे दात फक्त अन्न चावण्यासाठी नसतात ; ते नवीन येणाऱ्या पक्‍क्‍या दातांसाठी जागा सांभाळून ठेवतात . जर ते वेळेआधीच काढले तर बाकीचे दात शिफ्ट होऊन पक्क्या दातांना पुरेशी जागा उरत नाही , मग ते वाकडे तिकडे येतात.  त्यामुळे केव्हाही शक्यतो दुधाचे दात वाचवणं चांगलं”
” ‘पण तिची दाढ एवढ्या लहानपणी कशी काय एवढी खराब झाली?” सानवी च्या आईचा प्रश्न आला

पुढे काय झालं ते पुढील भागात……